الدلال المقرود

!!الدلال المقرود

موظوعي اليوم غير عن العاده !! بسولف لكم عن صديقة للأهل ……. لها جانبين

جانب متروس صفات حلوة ، تشوفون فيه حب الحياة .. والحيوية والطيبة والحنان والذكاء والحكمة وعزة النفس والأصل والأخلاق والسنع والعدال والموظوعية وخفة الطينه . ولا عليها طبخة لزانيا ما صارت ولا استوت .. وايد وايد (صفات لو بعددها ما أخلص (ماشاءالله عيني عليج بارده

!!أما الجانب الآخر

!!ياااااااا سااااااااااااااتر جانب أقشر

!!شراره

!!جراقي

!!خليط غريب مكون من فلفل علوب مع كافور وشوية حلول وحارج

(لا تنفعل !! لين إنفعلت عفسه عفسة ما تنبقى .. الهم يا كافي (عيني عليج حاره

وما ودكم تشوفونها .. عسره ولويه وإن حاشها التتنح وبركت !! عاد تعالوا فككوا إي نعم تعالوا فككوا روحكم وتكون

..أمكم داعيتلكم إن سلمتوا منها

.. طبعا آنا حبيت إني أنصفها وذكرت لكم محاسنها ومساوئها بالظبط مثل ما سوى الزعفراني بكتاب عجائب الزماني

وعلشان أقدر أكمل كتابتي عنها فكرت إني أدور لها إسم وبصراحة يا بنت الناس ما قدرت ألاقي إسم يرهم عليج كثر

!!إسم الأخ صالحه… إي نعم الأخ صــالــحــه طال عمرج

إنه وفي يوم الخميس الموافق ذاك اليوم طلبت مني أم (ر. هـ) (صديقه ثانية للأهل) وإهي ميته من الظحك وبوجود الأخ صالحه إني أسمع من فاه الأخ صالحه هالقصتين وأكتبهم في مدونتي .. والله وكيلكم إنفعلت الأخ صالحه إنفعال إيجابي وصدقت روحها علبالها لو نشرت سوالفها بتصير أبد الهام الفظاله .. آنا وافقت وقلت أونسها يمكن تظرب معاها وتنشهر!! يعني اللي إنشهروا أحسن منها؟ المهم إنني قررت أكتب لكم قصة وحدة بيوم والقصة الثانية بيوم ثاني إنشاء الله .. وطلبت آنا من إختي الصغيرونه والحليوه (ر . ب) إنها إتييب لي ورقه وقلم علشان أنقل كلامها حرفيا بس ما رظت الله يهداها تقول إنها حست بالإهانه والإظطهاد خصوصا إني في يومها ذبحتها تطرش وكانت في كل مره أطرشها (تخزني!! طبعا آنا ولبرائتي ما فهمت معنى مخوزرها إلا لما حمرت العين علي .. إستسلمت وقام ولد إختي (ح.ب

وياب الورقة والقلم لي .. فقلت لها: أخ صالحه .. بالله سمعينا فاهج شيقول .... وفجأه

فكت الأخ صالحه حلجها وقامت تشيل وتشدخ خطر لا تخطف عين اللي يمها من التأشر إيد بشرق وإيد بغرب وريولها ياحاطتهم على القنفات يا منزلتهم … قلت لها: هوب هوب ياواش بكتب ما أقدر ألحق يا أخ صالحة .. الله هداها وخذت نفس طويل وقامت تسرد لي بحفنه من الهدوء النسبي

...تقول الأخ صالحه

طلعت مع أمها ذاك اليوم إتدور على شقه في الجابريه ، وشافت ذيك الفيلا اليديده اللي ما عندكم بحلا منها !! وعليها إعلان عود مكتوب فيه للإيجاروتحتها رقم تلفون موبايل .. اتصلت ويرد عليها واحد ما تدري كويتي ولا مو..؟

الأخ صالحه وبكل ذرابه : ألوووو مرحبا أخوي شفت رقمك على إعلان معلق في فيلا بالجابرية للإيجار وبغيت أسأل هذي الفيلا كامله للإيجار؟ ولا تأجرون فيها أدوار؟ لإني بغيت أأجر الدور الأرظي مع السرداب إذا ممكن؟ .. بس بكم إيجارهم؟

الدلال المقرود وبكل ثواله : لحظه لحظه لحظه من حقة الشقه؟ حقج؟

إي طبعا إنثول ليش إنها سإلته 4 أسئله بنسم واحد

الأخ صالحه وبكل قنوط : إي نعم حقي الدلال المقرود وبكل غباء : لا يبا لا .. هذي حق شركااات حق مؤسساااات وزااراااات .. لا يبا مو حقج

الأخ صالحه وبكل حسره : ويييييي غميظه

خانت حيلي صارت بخاطرها البنايه

الدلال المقرود وبكل إستغلال : ليش قميظه ليش؟ ما تقولين لي ليش .. (إهني ترى رفع تون صوته وبكل عنجهية كمل) .. إنتي تقدرين تأجرين بألف وميتين دينار؟

بقت عينها إي نعم بقت عينها وفتحت حلجها للحظه وسئلته

الأخ صالحه وبكل إستنكار : ألف وميتين دينار على البيت كله؟

الدلال المقرود وبكل إستهزاء : على البيت كله ؟؟!! الشقه بألف وميتين .. البيت كله بخمس آلاف دينار إييي بخمسه

أهو للحين متمكن ما يدري إشيايله بالطريج .. شوفوا إشصار طبعا الأخ صالحه هني وعت فجأه وحست بشي يسري فيها من أصابع ريولها لين قمة راسها .. حروره حروره هذي الخلطه الغربيه اللي طريتها فوق تحت جانبها الأقشر بدت تسري فيها .. وانتبهت الأخ صالحه إنها كانت طول الوقت مستسلمه وما خذت مقابل استسلامها شي .. وبثواني بدت هالإهانات اللي حذفها عليها الدلال المقرود يمين ويسار تتخطرف جدام عينها .. وكل هذا وأمها يمها بالسياره تترقب نتيجة الحوار بين الطرفين خصوصا وإن صوت الدلال المقرود كان عالي وطالع من التفلون .. يعني شنو ؟ يعني إن الأم سمعت كل شي .. أخير .. إستنشقت الأخ صالحه الهوا اللي حولها وجان

الأخ صالحه وبكل شراسه : شنو ؟ شنو شنو شنو ؟ آنا ما أقدر أأجر بخمس آلاف ؟ يا حمار يا كلب يا بوزقه يابسه .. طووووط !! آنا ما أقدر أأجر بخمس آلاف ؟؟ آنا إن بغيت مو بخمس آلاف أأجر !! آنا أأجر بخمس ملايين إذا موعاجبك

ترى هني قامت إتصارخ من قمة راسها .. تراوالي وهي تسولف إن السياره قامت تروح يمين ويسار وشوية بريكات فجائية وهي تسوق وتصرخ عليه

الدلال المقرود وبكل روع : إنزين إنزين إشفيج حمقتي ؟ آنا عندي شقه بــ 650 دينار

الأخ صالحه وبكل كبرياء : منك ؟ ماني مأجره .. إهني وصكت التلفون بويهه

ثاني يوم

ومن فجر الله والدة الأخ صالحه ما قدرت تنام وتمت توارص لين أصبحوا الناس والعالم داوموا والدكاكين بطلت .. جان تاخذ رقم مكتب الدلال وتتصل وترد عليها المأسوف على شبابها سكرتيرة الدلال المقرود

سكرتيرة الدلال المقرود وبكل إنشراح : ألووو .. مكتب بلابلابلا سباح الخييير

أم الأخ صالحه وبكل عسكريه: ألو ... سمعي ... أمس بنتي داقه عليكم جان يقول لها الدلال مالج إنتي تقدرين تأجرين بألف وميتين؟!! بنتي ما تقدر تأجر بألف وميتين وبس؟ بنتي تأجر بخمس آلاف وبخمس ملايين إذا مو عاجبج .. بس من هالدلال الحمار الكلب بوزقه يابسه (طووووط) ماهي مأجره ... هذا دلال هذا؟ قوليله خل يحسن نفسه

وجان تسد أم الأخ صالحه السماعة بوييها

يا جماعه تري السالفه خذت مني نص ساعة وآنا أنقلها على الورقه .. عيوني غورقت بالدموع من الظحك وقمت ما أشوف وآنا أكتب .. ليش إنها وهي تحجيها كانت بقمة الإنفعال وكأن الدلال المقرود كان جدامها

عسي كلامنا يكون خفيف عليها وعليكم .. وعساكم تكونون تخيلتوا معاي اللي آنا شفته وسمعته .. وإن كان كلامي خفيف على الأخ صالحه ؟؟ فترقبوني قريبا بقصتها الثانية واللي بتكون بعنوان عماد حمدي

بن عاقول